die storm kom

1978

E
die wolke teen die horison
breek swart die lugruim in
swaar's die swart wat hangend kom
dit dreig met bloed en dood
   die suide lê wit teen die lig
   die noorde donder voort
   die dood wat rammel teen die son
   die storm kom

die konka smeul in koue nag
verhit die donker krot
die wind deurklief die honger oë 
deur spleet in sinkplaatmuur
   in Houghton, Waterkloof en meer
   slurp vrate rande op
   verstik in kreef en kaviaar
   versuip in ou meneer

die eggo rammel van die dood
die hordes grom in hul nood
met stemme stom gesnoer deur wet
ons mense is besmet

die kerke sny die brood apart
spoeg krummels op die grond
die nagmaalbloed bevlek die land
dit stol dit reën wat seën
   die skeiding skeur deur siel en been
   van Jesus en sy Gees
   die deure bly gesluit en dig
   gegrendel in sy gesig

die eggo rammel van die dood
die hordes grom in hul nood
met stemme stom gesnoer deur wet
ons kerke is besmet

in Langa smeul die rookmis swart
in kerslig deur die stank
motorwrak bied skuiling aan
die neusloop krulkop kind
   Soweto vlam in nuwe hoop
   die treine is betyds
   die rye wat op busse wag
   vang ritmies nuwe gees

die eggo rammel van die dood
Afrika is in nood
die voete stamp tot poeierstof
die haat sal nog ontplof
   die eggo rammel van die dood
   hordes grom in hul nood
   met stemme stom gesnoer deur wet
   ons volkie is besmet
die storm kom